Delattre Pascal

Témoins: ACCARY Jacques, écuyer, sieur de La Rocque, capitaine et gouverneur de la principauté de Tingry REMBERT Charles, receveur du bureau des traites foraines REMBERT Pierre, chevaux-léger de la Cie de M le comte d'Auvergne DU PONT/ DUPONT Jehan/Jean, père de Jehenne NORMAND Adrienne, mère de Jehenne NORMAND x, tante de Jehenne DUPONT Anthoine, frère de Jehenne WARNIER Nicollas, oncle de Jehenne ROUILLACQ Jehan, Mayeur de Wissant ESTIVART Jacques, Bel-oncle de Jehenne DUFLOS Ckaude, ami CREPIN Gille, père de Gilles TALLEMANT Adrienne, mère de Gilles

Testament du 06/04/1665 chez Me Rembert à Hucqueliers [AD62 4E87] Au nom du pere et du filz et du Saint Esprit, Gilles CRESPIN marchand brasseur vivant en le bourq de Hucquliers et Jehenne DUPONT sa femme de luy pour leffect des presentes deubement et suffisamment auctorizée laquelle autorité elle a prins et receu en elle agréablement sans contraincte ni induction comme elle a dict, sains desprit et dentendement et ne voullant mourir ad intestat croiant quil nest rien plus certain que la mort et rien plus incertain que lheure dicelle, ont déclarez voulloir faire leur testament mutuel et ordonnance de derniere volonté en revocquant tous aultres quilz pourroient avoir cydevant faictz par codicille ou aultrement. Premierement recomandent leur ame à dieu, à la Bien heureuse Vierge Marie, à St André leur patron et à tous les saintz et sainctes de paradis priant leur voulloir pardonner leurs offenses et leur donner son paradis ; veullent et ordonnent que leur corps soient enterrez et inhumez dans la cimetiere de l'église dudict Hucqueliers dans laquelle église leurs services d'enterrement, octave et du bout de l'an soient chantez et célébrez et pour participer aux prieres font don aux pourchas à chacun 10 solz, de 6 livres aux pauvres dudit Hucqueliers et ung septier de bled quy sera converti en pain pour estre dellivré ausdits pauvres quy se trouveront aux services de l'Octave. Et quant aux biens temporels que dieu leur a presté en ce monde ils en ont disposé comme sensuit, cest assavoir quils font don à Charles et Gilles CRESPIN, frères, Louise CRESPIN femme de François PILLAIN et Anne CRESPIN femme de Francois SENLECQUE, soeurs, tous leurs enffans oultre pardessus cequilz leur ont donné pour leur contract de mariage, scavoir audict Charles Crespin leur filz aisné, une mesure de terre quilz ont acquis du nommé Anthoine LEFRANCQ scitué au terroir de Wicquinghem tenant aux hayes dudit lieu, 20 solz de rente fonssiere quilz ont aussy acquis de Louis LOUVET du hameau du (?) et deube à cause de 3 mesures de terre desquels ilz luy ont fait don par son contract de mariage du terroir et dixmaige au lieu nommé le Buisson poullieu. Audit Gilles Crespin, filz puisné 4 livres 13 solz 9 deniers de rente constituée à prendre sur les héritiers de Thomas HOUBRONNE, de Zoteux, 12 livres de rente surcensière sur Jean QUEHEN, de Quilen, à cause de 4 mesures et 1 quarteron de terre scitué audit lieu par eux à luy arrenté quilz avoient acquis de Adrien de QUEHEN frere audit Jehan, 2 mesures 3 quarterons de terre à usage de labeur size au terroir de Herly quilz ont acquis de deffunct Anthoine DU BOIS, 4 mesures de terre prise en une piece de 14 mesures au terroir dudit Herly quilz ont acquis de Jehan DU BOIS à présent deffunct frere dudict Anthoine, 10 solz parisis de rente fonssiere deube par les héritiers de Jehan Du FLOS de Wicquinghem à cause de 3 mesures de terre sise audit Herly au lieu nommé la Sablonniere ce pourquoy il y a proces en la sénéchaussée de Boullenois, 4 livres et deux poulliette de pareille rente surcensiere à prendre sur Jacqueline GODEFROY dudit Herly vefve de Antoine CLABAULT à cause d'une petitte maison jardin où elle est demeurante, 30 sols de pareille rente sur Sébastien MICHAUD du village de Preure et 5 mesures de terre en une piece à usage de labeur scituée au terroir de Bourthes au lieu nommé le fon du pot de boeurre quilz ont acquis de Pierre WAGUET et ladite rente fonssiere quy se trouvera deube par la femme de Abraham DERICQ à cause de 2 mesures de terre size au lieu des sabonnieres. A ladite Louise Crespin 20 sols de rente surcensiere quilz ont acquis du Sieur de Monbrun quilz luy debvoient à cause dun jardin à usage de pasture scitué audit Hucqueliers appellé le jardin au puich, lequel jardin ils ont donné entre autre chose à ladite Crespin par con contract de mariage avec ledit Pillain. A ladite Anne Crespin une piece de terre à usage de labeur contenant 8 à 9 mesures size au terroir dudit Hucqueliers quilz ont aussy acquis dudit feu seigneur de Bulsy Héricourt (...). Et plus font encore don à icelle Anne de la somme de 500 livres tournois pour une fois aussy à prendre sur leurs biens. Et quant au surplus de tous leurs autres biens meubles or argent monnoie et à monnoier, debtes actives et de touttes autres de quelques qualitez et conditions quilz puissent estre quy se trouveront apres leur trespas, ilz en font aussy don audsitz Charles, Gilles, Louise et Anne Crespin préalablement prisez la somme cy dessu donnez à ladite Anne, lestain, chaudrons eurain et cuivre que lesquelles Louise et Anne Crespin prendront par avant part, pour tout ce que dessus en jouir par chacun desdits donnataires (saulf du reste de légat desdits biens et meubles quilz partageront entre eux esgallement à le réserve préalablement prins pour lesdites Louise et Anne Crespin, ce quy est cydessus dict) apres le dernier deccedé desdits testateurs et non devant, à la charge de paier iceux donnataires esgallement les debtes passives quilz se trouveront aprez le decedz desditz testateurs ensemble les dons pieux, obsecques, funérailles. Déclarent quils nomment pour executeur du présent testament de la personne de Me Alexandre RAULT recepteur du prieuré dudit Herly auquel ilz prient avoir soing à lexecution d'icelluy. (...) Faict, passé et recongnu audit Hucqueliers le 6e jour d'Avril 1665 pardevant Philippe REMBERT nottaire roial en la présence de Francois DESGARDINS sergent roial et Thomas GRIGNON marchand tavernier tesmoins prins et appelez au deffault d'un autre nottaire résident audit lieu.